澳門充完電回來．．．

自從澳門開放賭權之後都未去過，即係話我一間賭場都未入過啦！！

今次大鄉理出成，同山頂朋友一齊去玩兩日一夜，總括嚟講都幾好玩嘅！

* * *

第一日搭金光飛航落船就去威尼斯人行街，居然一去到就喺Venila Suite同Carmen Sit每人買咗一對減價皮鞋^o^ 好笑！之後周圍行，有可能仲早（大約10點幾），好少人，可以周圍映相。我當然唔放過係花樣男子拍攝過嘅場景啦！不過我只係認得具俊表同絲草講 "烏點" 嘅橋，其他嘅都係差唔多。第一次去威尼斯人，感覺都幾好，周圍d佈置都整得幾靚，幾細緻，下次等weekdays人少d得閒再去過！

* * *

我地今次住一間開咗大約一年嘅16蒲，間房都幾靚，但係個operation就差d，有待改進。因為我地12點幾去到，居然話3點先有得check-in，咁我地迷唯有周圍行啦，到大約3點返去，又話我地同朋友間房唔可以同一層．．．嘩！唔係呀？！我同Carmen Sit即刻鼓譟，企喺front desk面前講呢間酒店嘅operation唔得，雖然front desk好有禮貌，但係個house-keeping, Sales & Operation department根本未協調到，搞到好多住客都要等好耐先有房．如果有意見書，我同Carmen Sit一定狂寫！！之後我地去咗一間好出名食蝦子面嘅舖頭食晏，3個女仔叫到一枱都係嘢食，隔離枱見到我地都有ｄ古怪>.<

* * *

我地又行去大三巴，買手信．．．不過當時已經好多人，行大三巴條街時好似入咗花市一樣，迫嚟迫去．．．下午去咗觀光塔，去食葡撻，之後去咗一間都幾地道嘅餐廳食葡國菜，OK啦。

夜晚就係去澳門必定嘅環節－－賭場！我地一行人去咗 MGM ＆ Wynn，好靚！不過我自己就覺得永利個環境感覺舒服d，佢地亦都喺永利贏咗錢！我自己就冇賭，今次好堅持！以前我都有玩吓，但今次真係堅持得好厲害！覺得自己好勁 ^v^

因為實在太攰嘅關係，返到酒店沖完涼，好早就瞓覺。

* * *

第二日一早起身同 Carmen 去咗義順食早餐，不過好難食．．．之後諗住人少d再去大三巴映相，點知，都係人山人海！！！食晏去咗路環一間餐廳食，即係＜遊龍戲鳳＞劉德華向舒琪求婚嘅地方。本來想去法蘭度，但係要排兩個鐘頭隊，即走！離遠見到一排排白屋仔，就知道嗰度係智厚前輩揹絲草返朋友家嘅地方，下次去映吓相先！

之後我地去咗新開冇耐嘅新濠天地行，OMG！係冇嘢行嘅，而且咁大個商場，得一個厠所，所有人都要迫埋一個用，要等好耐 >_<

之後就不如去返威尼斯人行街啦．．．起碼行得舒服d同埋多d嘢行！

* * *

好完滿嘅旅程！雖然中間有d不足．．．
不過我都想再去，下次同老公 weekdays 去住威尼斯人先！！