再睇一次流星花園．．．道明寺真係好吸引！
因為無意中知道亞視做緊流星花園，就睇一集啦．．．點知又覺得好好睇，於是上youtube同埋土豆網（土豆網係好好多！）由頭開始睇過．．．
第一輯嘅流星花園真係好好睇，道明寺同花澤類兩個角色都好迷人，好吸引，知道點解以前個個女仔都好鍾意佢地！呢兩個角色根本就係每一個女仔都想要嘅男朋友！雖然套戲中間有ｄ情節實在好低能，但係我成個weekend夜晚都一直睇到成４點先瞓呢，尋晚終於睇完第一輯啦！
雖然之前已經係電視睇過，但係有可能電視cut頭cut尾，有ｄ細節都要睇返先知！上網search過，原來第一輯流星花園係喺2001年拍嘅，嘩！好快又10年啦．．．一路睇，一路諗返以前嘅事，嗰時Carmen先同阿基啱啱拍拖冇幾耐，自己出嚟做嘢都係一年多ｄ，諗返起一齊去Karaoke，一齊去飲酒．．．宜家個個都結哂婚，有自己屋企．．．諗起以前個個都追日劇，台劇，Long Vacation, Love Generation, 星之金幣（酒井法子宜家已經要做真人版小丸子個阿媽啦！）同一屋簷下，愛情白皮書，東京愛的故事，上帝請給我多一點時間．．．以前真係有好多選擇，而且套套都好好睇．近來都係得伽俐略叫做好睇ｄ咋．．．
同同事講開（因為佢嗰段時間唔喺香港，所以好多都未睇過），佢話就係ｄteenages唔realistic，所以就會迷呢ｄ角色！！哈哈．．．對牛彈琴！！
相比起，第二輯流星花園就冇咁好睇喇，集集都睇到個人好心酸，做乜道明寺失憶咖？！個雪兒又唔吸引，又長又反反覆覆，就係結局嗰幾集先叫好睇ｄ．．．睇吓有冇時間先再睇啦！
不過連續開夜睇咗幾晚，實在好攰，要瞓夠先再嚟過！！
