Super Freezing Hokkaido Trip - Day 5

今日係最後一日行程喇...　亦都係大出血日子。

～第一站支笏湖冰濤祭～
因為係最後一日嘅關係，我將我地唔會著嘅衫都放哂落個 "gip" 裡面，點知今日去支笏湖係五日以來最涷嘅，一早已經有好大風雪，好彩去支笏湖嘅highway冇封，我地先可以好快咁去到... 去到之後，好大風，好大雪，經過一個面積有香港島＋九龍島咁大嘅湖之後，我地到達冰濤祭啦！呢個祭都幾大型，睇過咁多個雪祭後，其實都冇乜特別，不過有得玩用冰做嘅滑梯，仲要滑到一半定咗，我又唔係好重啫，唔知點解？！我地周圍映呀映，映吓個好大風嘅湖，映吓條橋，映吓雪，咁又過咗差唔多一個鐘。

～第二站Rera Shopping Outlet～
係我地大出血嘅時間啦！！！我知道我地最後一站會去outlet買嘢，所以我係香港已經做好preparation，上outlet個網將coupons download哂，map好哂我地target要去出血嘅地方。雖然話個outlet唔係好大，但我地有3個鐘時間都行唔哂，戰利品有：兩對Nike鞋，一頂Nike帽，一個係Anteprima買嘅皮袋，3包茶包，一件Le coq薄褸，兩條Levi's牛仔褲，兩條Edwin牛仔褲，其實我地仲睇中咗一件長身女裝褸，但係已經冇時間loo...

～第三站札幌機場～
到咗機場，我地即刻開 "gip" 放哂係outlet買嘅戰利品入去，再嗱嗱聲去check-in & 排隊入閂。札幌機場最唔好就係唔會開好多immigration counter，導遊話佢地仲會收工嘅，搞到我地個個鬼死咁趕住去入閂。下午五點鐘機，我地一團人差唔多兩點幾到機場，入閂後嘅時間已經差唔多四點三，排隊排咗差唔多兩個鐘...　佢地做嘢又唔係快，又開得少counter，又有好多班機...　成個機場好多人好亂...　

五日嘅行程咁又完結咗嘞！雖然out哂budget，我地決定揾個夏天去多次北海道，到時可以自己揸車周圍去，映吓花海，食吓雪糕！一定好開心！！

Super Freezing Hokkaido Trip - Day 4

今日好晏先起身，搞到好趕咁走落去食咗半個鐘頭早餐就上車... 今日已經係旅程嘅第四日，要去嘅境點大部份都去哂嘞... 雖然係咁，但時間都好似好趕！

～第一站雪上電單車～
雖然係貴咗D，都係決定自己一個揸一部電單車。先生會首先帶我地遊兩三個圈做熱身，之後就帶我地上山，映吓相，我地再有15-20分鐘時間飛車！其實都幾好玩，不過就千祈唔好跟係一D開得好快嘅車後面，因為我就係試過一次係導遊後面，結果 －＞ 食哂雪...　綜合團友嘅意見，各人都話上山好玩過飛車，因為路面不平，又可以去D唔同嘅地方...　玩完之後，個個D手指冰哂，好彩我地有帶口罩去，塊面先至舒服D！

～第二站小樽～
終於係買嘢嘅時間喇！我地去小樽運河映幾張相之後，就去行小樽好出名賣玻璃嗰條街！嗰度有一間舖頭有好多龍貓產品咖，即刻衝入去睇，睇呀睇，我最後買咗一隻龍貓毛公仔！之後行吓音樂盒間舖頭，周圍行吓之後再食埋杯六層雪糕：vanila, lavender, melon, green tea, chocolate & strawberry，好好味！！

～第三站網燒松板牛肉＋大鮑魚晚餐～
又係比導遊 "略"水時間，晚餐盛為HKD2000大元！
不過都好好味，松板牛肉係高級過神戶牛柳嘅，13000YEN都比佢啦！
有我隻手咁大隻嘅舞燒鮑魚，好爽，過得去啦！
佢仲有好多雞肉牛肉跟餐，食完雖然成身油煙味，但係都值嘅...

最後一晚我地住札幌京王酒店，我認為四間酒店最好都係呢間，地點方便，房間又唔太細。好好咁瞓一晚，聽日係最後一日啦...

Super Freezing Hokkaido Trip ~ Day 3

第3日酒店早餐放題，麻麻地。

～第一站登別地獄谷－地藏尊～
一早，落大雪，橫風橫雪，令到天氣更涷... 第一站我地去登別地獄谷，其實係冇咩睇，只係睇風景，導遊比我地落去映張相，行吓就上返車，連地獄谷個紅魔鬼都映唔到，並且遙望有珠火山，唉...

～第二站登別仍伊達時代村～
呢個係一個忍者村，周圍嘅環境係仿照古代名將伊達藩王300年間嘅歷史。我地玩咗忍者怪怪屋，係一間充滿忍者暗道嘅地方，差D迷路嘅我地，最後都揾到出路...好彩！之後睇一個唔知佢講咩嘅show，大約係講一幫忍者潛入另一幫忍者屋偷忍者名單，唔知係咪我睇卡通片嘅甲賀同伊賀派呢！我地仲玩咗估唔到咁驚嘅貓屋，裡面簡直係貓怪屋，無論聲音，氣氛，一路行我都係一直係豹豹後面，好驚！當我地走嘅時候，仲同咗小忍者映咗張相，He is so cute！

～第三站－海鮮大餐～
又係比導遊 "略"水時間，佢帶咗我地去一個海鮮市場自費揀海鮮 shabu shabu，我地叫咗一隻蟹，一隻北寄貝，一隻大螺，一隻海膽，總共2000蚊，係HKD並唔係YEN... 好貴嘅一餐午餐... 算啦，我地喺香港都唔會咁大洗食一餐二千蚊嘅午餐，唔理咁多，食咗先！食完晏，落嘅雪更大，我地冰住咁行去海邊映相，好涷好涷，不過好好玩！

～第四站熊牧場～
經導遊介紹，去熊牧場買馬油產品，因為自己皮膚唔好嘅關係，就買嚟試吓！呢個牧場好細，仲真係只得熊！我地買咗蘋果&曲奇餅，就入去餵熊。照導遊嘅講法要餵最入嗰個籠嘅熊，因為好多遊客都係餵開頭嘅熊，最入嘅就好少人餵，我地一舉手拋蘋果嘅時候，D熊立即舉手示意叫我地拋落去，真係好好笑咖！有一隻好蠢咖，成日都比隔離嗰隻搶咗D嘢食！

夜晚我地入住洞爺湖萬世閣，和式嘅房，瞓tatami；今晚又有溫泉浸，我又去！夜晚因為新年嘅關係，係洞爺湖有煙花睇，雖然好小型，好過冇啦！晚餐又係酒店食放題，麻麻地...

Super Freezing Hokkaido Trip ~ Day 2

北海道第二日，一早係酒店食早餐，日本有一個好方便嘅設計去整油沾多，你地睇吓張相就知！

～第一站旭川雪の結晶美術館～
一大清早落咗一場小雪，大家都好興奮，之後開車去旭川雪の結晶美術館。間美術館都幾靚，所有嘢都係有雪嘅六角形狀。雪の結晶美術館係用咗一個冬天時間起好，當中出名嘅就係裡面有一個好大嘅地方，興建嘅時候用好多條柱比D雪留落去裡面，溶咗之後就形成一大遍雪嘅結晶。裡面仲有一個好大嘅地方，好似一個threatre一樣可以比人影相。

～第二站上山滑雪～
都有好多年冇滑雪喇，都唔記得點滑，開頭真係有D困難，撻咗幾次之後就慢慢pick up返，都幾好玩。今日午餐係要自己食嘅，之後再係冰天雪地食一杯雪糕，好爽！

～第三站大通雪祭～
終於去到今次北海道戲肉－大通雪祭。每一丁目都有一座大雪雕，好靚！我地大約３點幾去到，一路行到５點幾，見到冰雕開灯前後嘅樣，好ＯＫ！我地影咗好多相，仲專登去揾香港代表隊嘅作品，主題係南獅，都幾靚！

夜晚我地住東瀛游好宣傳嘅果子王國溫泉酒店，晚飯係酒店嘅放題，一般啦！
食完飯去咗酒店嘅室內泳池玩，不過唔係真係咁好玩，反而我地覺得佢個sauna好D，我地用咗佢地浸溫泉嘅方法去焗sauna，即係先去焗sauna，再浸涷水，再焗sauna，再浸涷水，再焗sauna，咁就完成嘞！之後成個身都好熱好舒服，D毛孔張開哂，污糟嘢走唒出嚟，good哂！我仲去咗浸佢個溫泉，希望對D皮膚好D啦...

Super Freezing Hokkaido Trip ~ Day 1

北海道trip出發啦！第一日係年初二零晨四點幾機，因為跟團嘅關係，我地要一大早（真係好早）零晨兩點鐘去到機場。機場半夜一間舖頭都冇開，check in之後唯有入去24hr嘅大家樂坐，食吓嘢... 行吓坐吓好快就上得機，不過上到機之後因為又乾燥又窄，瞓吓醒吓，咁就到咗北海道。一落機，見到白茫茫一遍，已經好開心，但豹豹就話好驚喇，哈哈，係我迫佢嚟D咁涷嘅地方嘅！！^v^

～第一站就係要搭兩小時車去旭川～
首先去旭川拉麵街食拉麵，原來隨咗札幌有拉麵街外，旭川都有一條細嘅，得８間拉麵店，我地一團人再加上另外嗰10團8團人，已經將8間拉麵舖頭攻陷咗，每一間都大排長龍。我地揀咗一間有多D日本人幫襯嘅去食，真係好好食，但有可能因為佢地天氣涷嘅關係，碗碗麵都有一層油浮係面，好肥！

～第二站旭川動物園～
企鵝，北極熊，老虎，獅子，海豹等等都可以睇到，D動物都幾蠢幾得意！不過真係好涷，連我呢個唔係好怕涷嘅人都話涷，天氣就即係好涷嘞！我地喺差唔多動物園收舖時去，我地好快咁走一轉，睇哂D特別嘅動物就走嘞。

～第三站旭川冰雪祭～
我地今次旅行會去３個冰雪祭，旭川呢個規模較細，但係都好多嘢睇！各式各樣嘅公仔用雪雕出嚟，有D都幾似咖！同圍映吓相，行吓，又上車去食晚飯 loo。

第一晚嘅晚飯係網燒放題，一般啦，跟團嘅都唔會預佢D嘢食係好好食咖啦...
第一晚嘅酒店係旭川Terminal Hotel，又係一般啦...