小丸子頭 + 皇后瑪頭

天氣實在太熱啦，尋日一早就同老公去剪頭髮，點知．．．我變咗做小丸子．．．佢幫我剪咗一個小丸子頭．．．諗住成兩個月都冇剪應該冇咩事，但係剪完出嚟．．．唉，冇辦法，唯有等佢慢慢長。我諗我可以半年都唔洗剪，留到冬天就啱啱好！
之後去動漫節，真揾笨，比咗HK$５０入場，諗住去買PSP games，但係入面大部份都係figures & 公仔，仲有好多無聊嘢，又多人，行咗兩個round，兩手空空就走咗嘞，以後都唔去呀！！！
咁我地之後就冒住有酷熱警告的天氣之下由會展行咗去皇后碼頭映相，好勁呢，行到過去，成個人溶咗，好多人好多警察，原來林鄭月娥係度同靜坐絕食嘅人針鋒相對。我好多時都覺得表達自己意見唔係唔好，但係都要睇情況，明知一定要拆，咁搞咁多嘢做咩呢，現在香港已經回歸中國，有好多有英國值民地嘅嘢都唔可以留低，皇后碼頭個名可唔可以改做人民碼頭就逃過被拆嘅命運呢？哈哈！其實之前已經想去映天星，到宜家拆哂都未映到，咁就襯最後一日去映皇后碼頭啦。皇后碼頭對於我嚟講嘅回憶比天星係冇咁深，記得以前每星期去文化中心跳舞，返summer job，ANA放工，甚至去尖沙咀我都會搭／經過天星，天星係一個超級方便嘅地方，但係見佢宜家拆哂，好似冇咗Ｄ嘢咁．．．舊嘅唔去新嘅唔嚟，香港係要進步呢！

Chocolate Concorde

今晚同DHL舊同事去學整一個係Grand Hyatt出名嘅Chocolate Concorde。今次係第二次去學整，都幾好玩，不過二百五十蚊就好似貴咗Ｄ，雖然佢話個Ｄ蛋糕料係特別靚，而且成個都係用好高濃度嘅朱古力，當時食就覺得好甜，唔知我整呢個好唔好食呢！？
Yummy ^o^

好多人結婚．．．

２００７年又過了一半，開始收到好多朋友嘅結婚消息．．．
９月x 2
１０月x 1
１１月x 1
最開心嘅就係１０月嗰餐會喺Disneyland Hotel擺，著靚Ｄ同迪士尼朋友映相，諗到都想即刻去＾v＾

Loreal Focus Group

尋晚被邀請去咗Loreal-Vichy嘅focus group，放工要特登去到時代廣場佢地嘅office，都幾遠。橫掂之前未試過，就去睇吓係咩嚟。原來Vichy將會有個新水份product launch，就請一班會員上去分享吓對呢個新product嘅感覺同睇法：內容包括有新嘅magazine ad，leaflet，video，產品嘅試用及texture，價錢，仲有佢地做promotion嘅方法點先可吸引我地繼續用呢個牌子。過程好快就過咗兩個鐘，而且仲over-run添，酬勞就係有車馬費３００大元及７００蚊coupon，嘩～總共１０００大元，好吸引！完咗之後即刻call的士返屋企～～如果有多幾次嘅話，我都會專登去．．．heehee！！

驚人發現．．．

今日有一個驚人發現，原來我老細已經考咗Six Sigma嘅Black Belt好耐．．．Oh．．．咪睇佢平時吹水唔抺咀，佢嘅Quali都幾勁．．．嚇親我@.@　佢問我讀完Green Belt仲讀唔讀埋Black Belt定Master，其實我自己都唔係好知，本來諗住讀Lean Six Sigma Black Belt，但又唔知個資格係唔係每個地方都應同，早知就問佢意見啦！上Six Sigma & HKQMA個網睇咗一陣，見到裡面嗰Ｄ人全部都係我宜家嘅阿sir，有Ｄ反感，而且又唔知道讀咗之後可以做乜同有咩用，都係諗清楚Ｄ先決定。

玩通頂

終於都考完試啦，襯７１假期，尋晚去咗Carmen屋企玩通宵！好耐都未試過啦，一晚嘅時間過得好快，好似玩吓呢樣嗰樣就一晚；但係玩完就好攰，今朝返到屋企，沖完涼做埋mask，就瞓到成５點幾先起身！都唔好有第二次玩通宵啦．．．>.<